هل شركة اوبو - oppo كويسة ؟ وليه ترشيحات المراجعين ليها قليلة ؟

بسم الله الرحمن الرحيم

موضوعنا النهاردة عن

هل شركة oppo كويسة ؟ وليه ترشيحات المراجعين ليها قليلة ؟

شعار شركة اوبو - oppo

مبدئيا معلومات بسيطة عن شركة اوبو - oppo :

هى شركة صينية تهتم بتصنيع الالكترونيات تم تسجيلها عالميا عام 2001 وانشائها رسميا فى 2004 واحد اهم فروع انتاجتها هى الهواتف الذكية وبتعتبر شركة فرعية من شركة BBK Electronic وده الشركة الى بتضم بجانب oppo شركتين تانيين وهم oneplus و vivo
(لو استغربت من المعلومة ده تابع مقال امبراطوريات الهواتف - شركات اصلها شركة واحدة عشان تتفاجئ بمعلومات اكتر)

وكان بداية دخول الشركة فى مجال الهواتف عام 2008 واعلى فئة فى هواتفها هى سلسلة ال find ومنزلش هواتف فى الفئة العليا فى السلسلة ده من 2014 واحدث هواتفها حاليا هو ال f1s وبتعتمد فى اجهزتها على android وواجهة المستخدم الخاصة بيها هى color os .

الشركة عالميا حققت تقدم مبهر فى اخر سنتين لو تشوف الاحصائيات التالية هتلاقى ان الشركة مكنش ليها وجود بشكل فعلي فى حصة السوق من ضمن اول 6 شركات فى سنة 2014 وفى سنة 2015 بس بقت فى المركز السادس عالميا بنسبة 3 % من المبيعات وفى 2016 هتلاقى النسبة اتضاعفت ل 6.8 % يعنى نمو كبير جدا فى فترة قصيرة ووصلت للمركز الرابع عالميا .

صورة لاحصائيات السوق العالمى توضح تقدم شركة oppo خلال السنتين الماضيتين

وفى الصين هتلاقيها تقدمت فى المركز الاول وضاعفت حصتها فى السوق عن 2015 بنسبة 122% وتفوقت على العملاقين xiaomi و huawei 

تقدم شركة oppo فى الصين 

**********

طب بالرجوع لموضوعنا فى مصر 

 هل شركة oppo كويسة ؟!

اكيد والا مكانتش حققت التقدم ده عالميا الشركة بتصنع الهواتف بخامات جيدة جدا وممتازة وبتهتم خاصة بالكاميرا فى تسويقها وفى مصر الشركة بتهتم نوعا ما عن الشركات التانية بخدمات ما بعد البيع فقلة ترشيحات المراجعين ليها مش بسبب مشاكل للشركة 

وده ينقلنا طب ليه المراجعين بشكل عام ترشيحاتهم فى الفئات المختلفة بيكون تواجد oppo فيها قليل ؟!

اى مراجع دايما بيحاول انه ينصح متابعيه بالافضل وده متعلق بالفئة السعرية بشكل كبير فالمراجع مهمته انه يقدر يبلغك بافضل اجهزة فى السعر المحدد وللاسف شركة oppo غالبا ما بيكون اجهزتها مش الافضل فى التسعير بالنسبة لامكانيتها .

طب هل شركة oppo مش فاهمة كده او مش دارسة السوق كويس ؟! 

لا طبعا الشركة دارسة السوق المصرى بشكل ممتاز ومبيعاتها جيدة فى السوق لانها فى الغالب مش بتستهدف الشخص الى مهتم بالامكانيات قدر ما بتركز على نقط مختلفة تحققلها تواجد مرضى فى السوق وسبب ارتفاع اسعار هواتفها وهى بتستهدف مين هتلاقيها فى النقط ده 

1- الحملات التسويقية : اى حد هتلاقيه سمع عن الشركة وده لان الشركة بتصرف بشكل كبير على حملاتها الاعلانية والى من الطبيعى انها هتحمل نفقات الدعايا على المستهلك لانها اكيد يهمها فى الاخر الربح

2- التجار : ال deal بتاع الشركة بيكون مناسب للتاجر اكتر من الشركات التانية وبيحققله ربح جيد وببساطة عملاء الonline مختلفين عن العملاء على ارض الواقع الى بالنسباله مصدر المعلومة الموثوق فيه هو التاجر الى هيميل للربح الافضل بالنسبة ليه كمان الشركة بتفرض قواعد صارمة ان يكون سعرها ثابت فى المحلات كلها بحيث ميكونش فى مضاربة على سعر هواتفها وده بيدي قيمة للمشترى وتحكم كامل من الشركة على السوق 

3- عشق ال iphone : ده طبيعة تاصلت فى الشعب المصرى للاسف لكنها كمان موجودة فى الصين .. وهى ان عامتا لزوم الفشخرة بغض النظر عن الفلوس الى معاك المستهلك عاوز يمسك الشكل ده الى الاسطورة بتقول انه دليل فخامة طب والى مش معاه !! على الاقل يجيب حاجة قريبة فى الشبه منه .. وده ببساطة الى بتلعب عليه عامتا oppo تصميمات منسوخة من ال iphone وواجهة مستخدم قريبة منه وبسعر اقرب للمستهلك منه اكيد .

(ده مش معناه انى بهاجم منتجات لشركة اثبتت جدارتها فى السوق وهى apple لكنى بهاجم فكرة انك تمسك فون لشكله قبل ما تبص لامكانياته والى تقدر تدفعه ولمعلومات اكتر عن الموضوع ده اقرا مقالنا التالى ما هو افضل براند او ماركة موبايل ؟!) 

4- التركيز على خدمات ما بعد البيع : على الرغم ان مفيش فى مصر حاجة اسمها خدمة ما بعد بيع محترمة وكون الهاتف ضمان دولى او محلى مبتفرقش كتير الا ان الشركة فعلا على الاقل افضل من منافسيها فى الجزء ده

وبشكل عام على قلتها الشركة لها بعض الاجهزة المنافسة فى فئة سعرها بشكل كبير 

اما بقى لو عاوز تعرف افضل الهواتف فى كل فئة سعر فشوف المقال متجدد ده
افضل ترشيحات الهواتف فى الاسعار المختلفة

ايه هى اجهزة شركة oppo المنافسة فى فئتها السعرية فى مصر :

فى الفترة الاخيرة شركة oppo خلفت توقعاتنا وكان ليها وجود مع هواف مهمة ومنافسة فى فئتها السعرية فقامت شركة oppo فى نهاية عام 2017 باصدار احد افضل هواتف شركة oppo منافسة فى فئته السعرية وهو هاتف oppo f5 نسخة 32 جيجا و 4 جيجا رام .. المفاجئة للمجتمع التقنى هنا ان الهاتف بسعر 5490 رسمي ومع التجار يوصل ل 5100 كان سعر صادم لان لاول مرة شركة oppo تسعر هاتف من هواتفها صح وكان فى منافسة شرسة ما بينه وبين huawei mate 10 lite و infinix zero 5 والى تقدر تشوف مقارنة ما بين oppo f5 و huawei mate 10 lite من هنا "ايهما افضل OPPO f5 vs Huawei mate 10 lite" 

الشركة بقى مقدرتش تسيبنا نفرح فبعد شهر واحد ومع بداية عام 2018 اعلنت الشركة عن توفر النسخة الاعلى من هاتف oppo f5 ب 6 جيجا رام و 64 جيجا ذاكرة داخلية بسعر 7000 جنيه وبفرق سعر 1500 جنيه عن oppo f5 نسخة 32 جيجا بايت كاملة وبكده كان تسعيرها المرة ده غير مناسب بالمرة خاصة مع قرب الجهاز من فئة سعر مختفة باختيارات افضل بكثير !! 

مراجع المعلومات والاحصائيات :

1

2

3

4

كلمات دلالية :
شركة اوبو فى مصر 
اداء شركة اوبو فى مصر 
هل شركة اوبو كويسة 
شركة oppo فى مصر
تعرف ايه عن oppo 

************

فى نهاية المقال نتمنى ان نكون افدناكم ولا تنسى ان ردك على المقالات يشجعنا على الاستمرار ... لافضل اسعار الهواتف من هنا او من هنا

ولا تنسى الاعجاب بالصفحة

الكاتب : Egyptian Reviewer

شارك الموضوع

مواضيع ذات صلة