للنقاش : متمسكش الطبلة عيوب شركات الهواتف

بسم الله الرحمن الرحيم

للنقاش : متمسكش الطبلة عيوب شركات الهواتف

متمسكش الطبلة : عيوب شركات الهواتف فى مصر
حاجة عاوز اتكلم عنها من زمان .. انت المستخدم عارف يعنى ايه مستخدم ؟! يعنى الشركة بتجري وراك عاوزاك تشتري منها عاوزاك تكون جزء منها بدونك مفيش شركة انت الملك والشركة هى التابع الى بتحاول ترضيك .
متتحولش من مكانتك العالية اوى ده وتتحول من من مستخدم له حق الاختيار والانتقاد وتبقى مشجع ولو بقيت مشجع لاقتناعك بالشركة ومعرفتك بعيوبها قبل مميزاتها متتحولش لمحامى قضيته هو انكار اخطاء سواء موجودة او لا .

تخيل ان فى الفترة الى فاتت كان فى ناس فى جروبات مستخدمى الهواتف بتتحظر من الجروب لوجود مشكلة فى الشركة من مستخدم تانى الى هو المفروض يدافع عنه !! مش معنى ان الفون معاك كويس انه هيبقى كويس مع كله ومش معنى ان فى مشكلة مع حد ان العيب منه او انه بيهاجم الشركة ممكن يكون معاه مشكلة عادي جدا !! وغالبا مش هيبقى فيه شركة تانية دفعاله عشان يحط مشكلته كده :) .

طيب رغم ان كلامى هيزعل ناس كتير بس خلينا نقوله ونتمنى من الى هيشوفه يتقبله عادي جدا لانك مستخدم من حقك تقارن ومن حقك تعرف 

عيوب شركة Apple :

 اه هتاخد حماية وتحديثات منتظمة واهتمام من الشركة وخامات ممتازة بس هتدفع سعر كبير وهتتحرم من مميزات تانية كتير بيتيحهالك الشركات التانية الى بتنفاس بعضها فى نظام الاندرويد ولان apple ملهاش منافس بنظامها ios فالى بيحركها هو نفسها وبس وبتستغنى عن مميزات تانية بتدى افضلية للمستخدم  مع انها ارغمت انها تبتدى تشوف غيرها وتنفذ المميزات الى اتحرم منها مستخدميها من سنين (( فخامة التفاحة لا تكفى ))

عيوب شركة OPPO 

اه سوفت متوافق مع العتاد وقريب من ال ios "شكلا" وخامات جيدة وخدمة ما بعد البيع الجيدة والتركيز على الكاميرات خاصة السلفي الا ان اسعارها غير مقبولة وبيتحمل عليها مصاريف الدعاية المهولة والامكانيات بالنسبة لمنافسيها فى فئة السعر قليلة   وبتنحت تصاميم ال iphone  لكنها ناجحة بده ومعليهاش لوم .

 عيوب شركة Xiaomi

اه شركة محترمة مركز متقدم فى المبيعات وامكانيات حرفيا تقدر تقول عليها جبارة فى سعرها الا ان الخامات عندها مهياش الاولوية والكاميرا بتقتصد فيها الا ان نجاحها فى تسعيرها وده برده مقبول جدا .

 عيوب شركة infinix - Tecno :

 شركات ناجحة فى مصر جدا وامكانياتها معقولة على سعرها وكاميرات جيدة فى سعرها وبتهتم بمميزات الى عاوزها المستخدم وبتخدم على الى محتاجه فئة الشباب وبتنقل تجربة من فئات عالية وموفراها فى فئات اقتصادية الا انهم بيقتصدوا فى الخامات واسوء تجربة ما بعد البيع فى مصر حتى الان بامتياز مع carlcare

عيوب شركة HTC - Sony :

 شركات كبيرة جدا وكانوا مراكز قوية جدا فى اخر 10 سنين وخامات ممتازة وتصميمات جيدة بامتياز الا ان ابتدى انحدار عالمى كبير اخر سنتين فى مبيعاتهم عالميا او حتى فى مصر بسبب فشل تسويقى واسعار مبالغ فيها جدا هنا بالنسبة للمنافسين ومبيعاتهم قائمة فى مصر على قوة البراند لا اكثر .

عيوب شركة Samsung : 

شركة مينفعش نتكلم عليها لانها انجح شركة عالميا الا انك فى مصر لاسباب كتيرة جدا من ضمنها التسعير وقيمة الجنيه والمنافسة الشديدة مش هتاخد منها حاجة فى الفئة الاقتصادية وغالبا الوسطى وطبعا لو اتجهنا لفئة الاجهزة العليا فهى ركيزتها الاساسية فيها .

عيوب شركة Motorola : 

شركة محترمة جدا خامات وسوفت بسيط وكاميرا بتكون احد المميزين فى الفئة السعرية لكن تسعير مبالغ فيه احيانا و ساعات بينقص حاجات تحسسك ان الطبخة ناقصة ملح :) كمان تقريبا تقدر تعتبر الى ماسك توكيلها تانى اسوء خدمة ما بعد البيع فى مصر .

عيوب شركة HUAWEI : 

طبعا شغلها العالمي معروف الا انها بالنسبالنا هنا فى السوق المصرى بتمشى على سطر وتسيب التانى فى موضوع التسعير مش دايما هتكون الافضل فى سعرها .

عيوب شركة MEIZU

شركة صاعدة عالميا فى مصر ينقصها التسويق والانتشار وبتعشق MediaTek الا ان الموضوع ابتدى يتغير وساعات تسعيرها بيخونها فى مصر خاصة فى بدايتها .

ببساطة الخلاصة الى نستشفها من الموضوع ده بالنسبة لشركات الهواتف 
  •  لو كان فى حاجة كاملة مكنش هيبقى فى وجود لكل الشركات ده !
  •  انت بتختار فون مش بتختار شركة .
  • كل تسعير والمنافسة فيه بتختلف عيب لم حد يسالك على فون فى سعره وتقوله اسم شركة حلوة مش لازم الى معاك كويس هيبقى فى سعر تانى برده كويس مش لازم الى معاك اصلا يبقى الافضل فى سعره عادي .
  • مفيش فون ماسك فئة سعره بشكل كامل فى فروقات بين كل فون والتانى ممكن الى يكون كويس اداء ميكنش كويس كاميرا عادي جدا فاولوياتك هى الى هتحدد الى انت محتاجه .

************
فى نهاية المقال نتمنى ان نكون افدناكم ولا تنسى ان ردك على المقالات يشجعنا على الاستمرار ... لافضل اسعار الهواتف من هنا او من هنا
ولا تنسى الاعجاب بالصفحة

شارك الموضوع

مواضيع ذات صلة