يعنى ايه نسبة عرض 18:9 وايه الفرق بينها وبين 16:9

بسم الله الرحمن الرحيم

يعنى ايه نسبة عرض 18:9 وايه الفرق بينها وبين 16:9

يعنى ايه نسبة عرض 18:9 وايه الفرق بينها وبين 16:9

كتير جدا سمعنا عن الاجهزة الى ظهرت من بداية 2017 بنسبة عرض او aspect ratio 18:9 مع اتجاه الشركات لتقليل حواف الهواتف بشكل كبير عشان يصبح تقريبا الهواتف اقرب الى هواتف بدون حواف عشان كده مقالنا النهاردة عن "يعنى ايه نسبة عرض 18:9 وايه الفرق بينها وبين 16:9".

ايه هى aspect ratio او نسبة العرض ؟!

نسبة العرض او ال aspect ratio  هى النسبة ما بين طولى ( الطول والعرض ) للصورة او الفيديو او المحتوي المعروض او الشاشة نفسها وليس ابعاد الجهاز ككل يعنى لو قولنا مثلا نسبة العرض او ال aspect ratio  لجهاز معين هو 1:1 فطبيعى هتلاقى الجهاز ده الشاشة بتاعته مربعة مش مستطيلة مثلا عكس 16:9 الى لو اعتبرنا ان احد الابعاد طوله 16 سم يبقى البعد الثانى 9 او مضاعفات الارقام ده المهم الحفاظ على نفس النسبة .
على سبيل المثال اشهر نسبتين للعرض هى 4:3 و 16:9 الاولى لو تفتكروا فى اجهزة التليفزيون القديمة نسبيا الى كان شكلها بشكل عام اشبه او اقرب للمربع .. مش مربع كامل ولكن اقرب لشكل المربع اما التليفزيونات الجديدة ال hd وال full hd هتلاقيها غالبا بنسبة 16:9 نفس الكلام اغلب التليفونات لحد سنة 2017 بنسبة 16:9 .

aspect ratio  او نسبة العرض 18:9 :

اول استخدام لنسبة العرض ده كان سنة 1998وكانت موجودة كنسبة عرض متوسطة ما بين نسبة عرض السينمائية ونسب العرض للتليفزيونات لكنها مكنتش منتشرة حاليا فى الفترة الاخير خاصة مع بداية عام 2017 ابتدت كتير من المواقع تعرض المنتجات التليفزيونية والمسلسلات بنسبة العرض الجديدة 18:9 او 2:1 لكن الانتشار فى مجال التقنية بالذات كان مع بداية اطلاق الشركات للنسبة ده فى تليفوناتها مع LG G6 وبعدها تبعها كتير من الشركات وانواع الهواتف زي samsung galaxy s8 / note 8 وكتير من الاجهزة تباعا وكان الفكرة من استخدام الابعاد ده هى ان اصبح متاح للشركة استخدم شاشة بالحجم ده بدون زيادة طول الموبايل وده باستغلال مساحة الحواف الى كانت موجودة قبل كده بتقليلها وده مش هيخليك تحس انك ماسك تليفون طويل لانه بشكل عام هو نفس حجم التليفون العادى الى كنت ماسكه قبل كده ولكن شاشة العرض اكبر وده بيخليك تشوف بيانات اكبر كمان هتلاحظ ان النسبة ده مفيدة جدا فى خاصية تقسيم الشاشة او استخدام تطبيقين فى نفس الوقت مثلا .

التوجه فى المستقبل للهواتف بدون الحواف :

النسبة ده هتنتشر اكتر لانها لاقت قبول من المستخدمين بشكل عام فى الشكل الخارجى للتصميمات وهتفضل تريند لفترة من الزمن عشان كده غالبا هيكون خيار مهم بالنسبالك شراء تليفون بالابعاد الجديدة علشان يكون مناسب (( تصميميا )) للمستقبل بشكل افضل كمان ابتدت تنتشر ووصلت كمان للاجهزة الاقتصادية الجديدة الموضوع مبقاش منتشر على الاجهزة العليا فقط زي زمان وده شئ كويس عشان هيكون فى تنوع فى الاسعار .

تاثيرات التوجه للتقنية الجديدة فى aspect ratio او نسبة عرض 18:9 :

اهم التاثيرات الملحوظة ازرار النظام باسفل الشاشة مش هتبقى موجودة لان ماصبحش ليها مكان واصبحت الازرار داخل الشاشة وليست ازرار هاردوير .

• اصبح وجود مستشعر البصمة اسفل الشاشة شبه مستحيل مع الابعاد الجديدة .
• توجه الشركات لتوفير تقنيات جديدة لتناسب نسبة العرض زي شركة VIVO الى كانت اول شركة تعلن عن وجود البصمة مدمجة مع الشاشة والى بيوفر وجود البصمة بشكلها الملحوظ . لو عاوز تعرف اكتر عن شركة vivo يهمك تقرا المقال ده "امبراطوريات الهواتف - شركات اصلها واحد" وكمان اقرا المقال ده "شركات الهواتف الصينية فى مصر ومركزها العالمي"
• كمان الشركات ابتدت تتصارع على اعلى نسبة للعرض مقابل جسم الجهاز

خلاصة الفرق ما بين ال aspect ratio او نسبة العرض 18:9 و 16:9 :

فى مجال الهواتف مفيش فرق اساسي فى حجم الموبايل نفسه قد ما النسبة فى حجم استغلال الشاشة بالنسبة لجسم الجهاز كل ما الشاشة كان وجودها بالنسبة لجسم الجهاز كبير ده معناه ان الحواف اقل بكتير .. وان الموضوع هيكون هو الشائع فى المستقبل القريب عشان كده ممكن يتحط ضمن اولويات اختيارك لو كان عامل مهم بالنسبالك ان التصميم يفضل مناسب لفترة اطول

هاتف sico nile x الهاتف المصرى ما له وما عليه ومواصفاته وعيوبه

بسم الله الرحمن الرحيم

هاتف sico nile x الهاتف المصرى ما له وما عليه ومواصفاته وعيوبه

هاتف sico nile x الهاتف المصرى ما له وما عليه ومواصفاته وعيوبه

ظهر من يومين اول هاتف صنع فى مصر هاتف sico nile x وحابين ننتكلم بموضوعية عنه وايه مواصفاته ومميزاته وعيوبه .

الهاتف من انتاج الشركة المصرية لصناعات السيليكون sico وتنطق "سيكو" مش سايكو اه والله زي ما بقولك كده شعار الشركة فى وقت الدعايا للتابلت من فترة كان سيكو تاب بيقرب الاحباب :) .. تخيل تبقى ماسك تليفون سيكو . طيب نفكنا من الاسم ونتكلم بجد .

من هى شركة سيكو sico :

الشركة موجودة هنا فى مصر من سنتين او تلاتة شركة صينية مش منتشرة ومجهولة نوعا ما بتبيع اجهزتها وبتركز على الفئة الاقتصادية الدنيا فى التابلتس والهواتف فهى مش جديدة ولا حاجة .. كان فى فترة وزير الاتصالات اعلن عن منطقة صناعية وعن اتفاقه مع شركات للتصنيع فى مصر بعد ازمة تعويم الدولار وكان من الشركات الى انتهزت الفرصة ده لتفوز بلقب اول هاتف صنع فى مصر كانت شركة sico  .

هاتف sico nile x  بيصنع بالكامل فى مصر ؟!

لا الهاتف بمكون محلى بنسبة 45 % وده مش عيب ولا هو مشكلة فكل البراندات بتتكلم تقريبا فى نفس نسبة التصنيع ده ما عدا 3 او 4 شركت نسبة تصنيعهم عالية زي سامسونج وهواوى و apple الى بيصنعوا وبيطوروا المعالجات الخاصة بيهم .. لكن الشركة المصنع بتصمم الهاتف وال board واى شركة فى العالم بتبتدى تستورد المعالجات والشاشات والرامات ومستشعرات الكاميرا والمستشعرات الاخرى apple نفسها فى ال iphone x كانت بتتعاون فى الشاشة مع samsung فالنسبة معقولة جدا جدا كمان وده مش تطبيل اكيد لكن احنا قولنا هنقول ما له وما عليه .

الاعلان عن هاتف sico nile x :

الاعلان تم خلال فعاليات معرض القاهرة الدولى للاتصالات من خلال وزير الاتصالات واعلن ايضا ان الشركة هتوفر 8 موديلات حديثة صنعت فى مصر ونصف الكمية مخصصة للتصدير لبعض الدول العربية والافريقية .

مواصفات هاتف sico nile x :

• ياتى الهاتف بشاشة 5.7 بوصة HD+  بابعاد 18:9 .لازم تقرا المقال ده عن الابعاد 18:9 "يعنى ايه نسبة عرض 18:9 وايه الفرق بينها وبين 16:9"
• ياتى الهاتف بكاميرا خلفية مزدوجة 13 +5 ميجا بيكسل .
• وكاميرا امامية 8 ميجا بيكسل.
• ذاكرة داخلية 64 جيجا بايت ورام 4 جيجا بايت .
• معالج ثمانى الانوية MT6750  ومعالج رسوميات .
• بطارية 2800 ملي امبير.
• usb type c
• الهاتف بييجى بنظام Android 7.1.2 من العلبة
• يدعم شبكات الجيل الرابع .
• الهاتف يحتوي على حساس بصمة الاصبع .

مميزات هاتف sico nile x : 

ابرز المميزات هتكون معروفة من المواصفات 

1.  شاشة بنسبة الابعاد الجديدة 18:9
2. شحن سريع و usb tybe c
3. كاميرا خلفية مزدوجة 

عيوب هاتف sico nile x : 

1. غير مناسب لفئة سعره فالتسعير مبالغ فيه نسبيا بالنسبة لمعالج الهاتف ومواصفاته
2. ايقونات الواجهة قديمة نسبيا
3. البطارية غير مناسبة اطلاقا بالنسبة لمواصفات الهاتف ومن غير المتوقع انها تدى اداء جيد .
4. عيوب اخري او لا هيتم تحديثها باستمرار فى حالة وجودها .

كلام فى الصميم عن sico nile x :

• الهاتف نقلة نوعية ممتازة ونسبة جيدة من المكون المحلى  .
• التليفون مبيطيرش ده مجرد هاتف ليه عيوبه ومميزاته فبلاش اللعب على عقول المصريين ده بالنسبة للاعلام .
• التليفون اما بيصور من الكاميرا الخلفية وبيتحط فريم فى نفس الوقت للتصوير من الامامية ده مش ميزة خارقة يا عمرو اديب.

سعر هاتف sico nile x : 

هو 4200 جنيه مصري اماكن شرائه ستتحدث وقت وجوده الفعلى فى الاسواق

تاجيل اطراح هاتف شركة سيكو sico nile x :

تم تاجيل اطلاق هاتف سيكو - sico nile x اول هاتف مصري الصنع الى بداية 2018 بعد سرقة 15000 بطارية كانت مخصصة للشحنة الاولى من الهاتف  والى اتسرقت بعد طلوعها من ميناء دمياط فى طريقها للمصنع . اعتقد ده استهتار مبالغ فيه ومسئ بشكل كبير للشركة فى مصر ان يتم سرقة هذه الكمية بدون رقيب
الخبر نقلا عن الشروق نقلا عن قناة النهار فى لقاء رئيس الشركة
تحديث :
تم العثور على شحنة البطاريات والقبض على المتهمين بهذه القضية واسترداد البطاريات والشركة تستانف الانتاج مرة اخري ويبقى السؤال ما هو رئيك فى ما حدث ؟!

قصة امل مصرى VoxEra

قصة امل مصرى VoxEra

صعب اوى انك تشوف ابتكار مصرى .. ولكن فى قصة الامل ده فريق مصرى غير الفكرة ده بابتكاره VoxEra وهو حصيلة جهد شباب مخلص لعمله وحابب ينجح فكرته ابتداء من بداية الفكرة فى اكتوبر 2015 الى ان شاء الله اكتمال مرحلة الانتاج والتوصيل فى شهر يونيو 2017 .

ايه هو VoxEra ؟!

ببساطة هو جهاز بيساهم فى حل مشكلة مصاريف التجوال لاجراء الاتصالات الهاتفية اثناء السفر والى بتكون باهظة بشكل مبالغ فيه وهيتيحلك الخدمة ده بدون اى مصاريف اضافية .. طب ازاى هيعمل كده 

ببساطة قبل ما هتسافر هتسيب شريحة تليفونك فى الجهاز ده وتوصله بال power و ال internet وتسافر ... بعد ما توصل تقدر بكل بساطة تستخدمة شبكة ال wifi فى انك تنزل app خاص ب VoxEra وهتقعدر تعمل اتصال مع الجهاز الى انت سايبه اصلا قبل السفر وهتقدر من خلاله ترسل وتستقبل مكالماتك من خلال رقمك العادى بنفس سعر المكالمة العادية فى بلدك باعلى جودة ممكنة 

ليه استخدم VoxEra مش اى app تانى وخلاص ؟!

ببساطة لانه تقنية مختلفة عن اى app تانى بيتيحلك الخدمة ده وده لانه مبيشترطش ان يكون الطرف الاخر الى بتكلمه او بتستقبل منه عنده نفس ال app او انه معاه smartphone لانك اصلا بتستقبل من خلال شريحتك العادية بداخل البلد وبيتم بعد الخطوة ده فقط باستخدام تقنية ال voip فى اتصالك .

ولانه بيتيج الاتصال برقمك انت بشكل طبيعى كانك جوة بلدك بالظبط 

وده شرح لطريقة عمله

وده مقارنة بين voxera وبين البرامج الى بتادى خدمات مشابهة نوعا ما

الشباب الى بايده فكر ونفذ ومصر انه يحقق حلمه 

زى ما الشباب ده حاول يعمل حاجة انت كمان تقدر تساعد فى بنائها عن طريق انك تساهم بالمشاركة معاهم فى عملية الانتاج او تحجز منتجك من خلال اللينك ده 

من هنا